Զեկ. ՌՈՒԲԵՆ ԱՎԵՏԻՍՅԱՆ

Ղեկավարվելով Հայաստանի Հանրապետության հարկային օրենսգրքի 230-րդ հոդվածի 3-րդ մասով և 245-րդ հոդվածի 2-րդ մասով, «Տեղական ինքնակառավարման մասին» օրենքի 18-րդ հոդվածի 1-ին մասի 42-րդ կետով, հիմք ընդունելով Արտաշատ համայնքի ավագանու 2024 թվականի դեկտեմբերի 25-ի N 393-Ն որոշումը և հաշվի առնելով Արտաշատ համայնքի ղեկավարի առաջարկությունը՝ Արտաշատ համայնքի ավագանին որոշում է․

1. Սույն որոշման 2-րդ կետում նշված անձանց Արտաշատ համայնքում սեփականության իրավունքով պատկանող և անշարժ գույքի հարկով հարկման օբյեկտ համարվող անշարժ գույքի և փոխադրամիջոցի գույքահարկի գծով սահմանել արտոնություն՝ ազատելով 2025 թվականի համար հաշվարկված հարկային պարտավորությունների վճարումից 937 521 (ինը հարյուր երեսունյոթ հազար հինգ հարյուր քսանմեկ) ՀՀ դրամի չափով՝ համաձայն հավելվածի և դրանց մասով անշարժ գույքի հարկ և փոխադրամիջոցի գույքահարկ վճարողի փոխարեն համայնքի բյուջեից կատարել վճարում։

2. Սույն որոշմամբ սահմանված արտոնությունները կիրառվում են հետևյալ քաղաքացիների խմբերի նկատմամբ․

1) Արցախյան (Լեռնային Ղարաբաղի) և Հայաստանի Հանրապետության պաշտպանության մարտական գործողությունների կամ հակառակորդի հետ շփման գծում մարտական հերթապահության կամ հատուկ առաջադրանքներ կատարելու կամ հակառակորդի նախահարձակ գործողությունների հետևանքով հաշմանդամություն ունեցող անձանց(կամ նրանց ընտանիքի անդամներին)` ֆունկցիոնալության խորն աստիճանի սահմանափակումով հաշմանդամություն ունեցող անձանց 100 տոկոսի չափով, ֆունկցիոնալության ծանր աստիճանի սահմանափակումով հաշմանդամություն ունեցող անձանց 75 տոկոսի չափով և ֆունկցիոնալության միջին աստիճանի սահմանափակումով հաշմանդամություն ունեցող անձանց 50 տոկոսի չափով։

3․ Սույն որոշումն ուժի մեջ է մտնում հրապարակմանը հաջորդող օրվանից։